Həzi Aslanovun 100 illiyi qeyd olundu
23-01-2010

     Azərbaycan Respublikasının Prezidenti cənab İlham Əliyevin sərəncamı ilə Böyük Vətən Müharibəsində Qələbənin  65 illiyinin bayram edilməsi  ilə əlaqədar  Milli Proqram təsdiq olunmuş və icrasına başlanılmışdır. Milli Proqramın icrası ilə bağlı Lənkəran rayonunda da silsilə tədbirlər keçirilir. Bu tədbirlərdən biri də iki dəfə Sovet İttifaqı Qəhrəmanı, tank qoşunları qvardiya general-mayoru  Həzi Aslanovun  100 illik yubileyinin qeyd olunmasıdır.                   

     Bu münasibətlə  Lənkəran Şəhər İcra Hakimiyyətinin başçısı Süleyman Mikayılovun təşəbbüsü ilə qəhrəmanın Lənkəran şəhərindəki ev-müzeyi əsaslı şəkildə  təmir edilmiş,  ekspozisiyalar  yenidən qurulmuş, adını daşıyan parkda abadlıq-bərpa  işləri aparılmışdır.

     Qəhrəmanın doğum günü- Yanvarın 22-də  Həzi Aslanovun  abidəsi önündə ümumrayon tədbiri keçirilmişdir. Tədbirdə Lənkəran ŞİH başçısı Süleyman Mikayılov  fəxri qaraulun müşayəti ilə  abidə önünə əklil,  Milli Məclisin deputatı Hadı Rəcəbli, Qəhrəmanın nəvəsi general-mayor Həzi Aslanov,  hərbi-yazıçı Abdulla Qurbani və digər qonaqlar,  hüquq-mühafizə orqanlarının, idarə, müəssisə və təşkilatların rəhbərləri,  İkinci dünya Müharibəsinin veteranları, minlərlə lənkəranlı  gül-çiçək dəstələri qoyaraq Həzi Aslanovun xatirəsini ehtiramla yad ediblər. Sonra tədbir Qəhrəmanın ev-müzeyində davam etdirilmişdir.

      İcra Başçısı və qonaqlar müzeyin  zənginləşdirilmiş  ekspozisiyasına  baxmış, veteranlar və məktəblilər çıxış edib qəhrəmana həsr edilmiş şerlər söyləmişlər.